Showing posts with label திண்ணை. Show all posts
Showing posts with label திண்ணை. Show all posts

Saturday, February 5, 2022

வந்தேறி


கீரைக்காரம்மா
மளிகைக்காரத் தாத்தா
ஆட்டோக்கார அண்ணா
உரையாடிய மொழி..
 
 
போக்குவரத்து நெரிசலில்
வசைப் பாடிய சொந்தங்களின்
அடுக்கு மொழி உட்பட..
 
 
எண்ணங்களின் சுருதியில்
இணைந்து விட்ட மொழி.
உணர்வுகளை மீட்டும் போது
நாட்குறிப்பிலும் கடிதத்திலும்
இயல்பாய் கசிந்த மொழி.
 
 
தாய் வழி மொழியல்ல
தாயையும் பாட்டியையும்
சுற்றிச் சுற்றி வாழ்ந்த சகமனித
சங்கிலித் தொடர் மொழி.
 
 
கயிறு திரித்த மடமையின்
ஒற்றைச் சொல் – வந்தேறி
உயிரோட்டமான பிணைப்புகளின்
நகக்கண்களில் கூர்முட்களை
ஏற்றியப்படி..




Monday, July 17, 2017

தேடாத தருணங்களில்

கூழாங் கற்களை
தேடிப் பழகிய கைகள்
வெறுங்கையாகவே
குவிந்து மூடிக்கொண்டன
ஒர் தீர்மானத்துடன்..

தேடுவதை ஏன்
நிறுத்திவிட்டாய் என
மெல்ல தட்டிக் கேட்கிறேன்
விரல்களை இதழ்களாக
விரித்துக் காண்ப்பிக்கிறது

தேடாத தருணங்களில்
மட்டுமே உருவாகும் சுயமான
ஒளிக் கற்களை

நன்றி: திண்ணை
http://puthu.thinnai.com/?p=35005

Monday, June 3, 2013

இடமாற்றம்

கண்களுக்கு எதிரே
விரல்களுக்கு இடையே
நழுவுகிறது தருணங்கள்


இந்நாட்டு மக்களின்
மெல்லிய சிரிப்பை
அதிராத பேச்சுக்களை
கலைந்திராத தெருக்களை
நேர்த்தியான தோட்டங்களை


வாரிச் சுருட்டி
வெண் கம்பளத்தில் அடுக்கி
அணைத்தபடி உடன் கொணர நேர்ந்தால்
கை நழுவுகிற தருணங்களைப் பிடித்து விடலாம்


நேசித்தவைகளை அங்கங்கே விட்டுவிட
சொல்கிற ஒவ்வொரு இடமாற்றமும்
வாழ்விலிருந்து விடுபடுகையில் , மரணத்தை
நளினத்துடன் தழுவப் பயிற்றுவிக்கும் ஒத்திகைகள்……


நன்றி: திண்ணை

Thursday, March 7, 2013

மார்கழி கோலம்

முகத்தை வருடிய தென்றல்
வண்ண வண்ண இளநிறங்கள் ஏற்று
சின்னஞ்சிறு இருதய வடிவங்களில் அமர்ந்தது
மேசையில் கிடந்த குறிப்பேட்டின் அட்டையில் ..


கைபேசி,கணினி,மடிகணினியின்
மின்னூட்ட கயிறுகள் நெரிக்கும் மேசைக்கு -
உயிர் தெளித்து மார்கழி கோலம் …

நன்றி: திண்ணை
http://puthu.thinnai.com/?p=18884#comment-14211


Monday, January 28, 2013

கவிதை பக்கம்

கவிதை பக்கம்
காலியாக சிலகாலம்
கவிதையான நிகழ்வுகளும்
குறைவான காலம்


திடீரென பள்ளிகூட அலுமினி கூட்டம் -
பழைய சினேகிதிகள் ஒவ்வொருவராய்
பேச்புக்கில் கண்டுபிடிப்பு - சபை நிறைந்தது
பேச்புக் கூட்ட பக்க உரையாடல்
பள்ளிகூட வராந்தாவாக சலசலப்பு


பலவருடத்திற்கு பிறகு புகைபடத்தில்,
அவளா இவள் ? இவளா அவள் ?
ஆறுவித்தியாச துணுக்காக
நினைவுகளும்,நிஜங்களும்..


சிரிக்க வைத்தவள்,சீண்டியவள்
சிணுங்கியவள்,கலகலத்தவள் -
ம்றுபடியும் பார்க்கையில்,
தீக்குச்சி நெருப்பென சீண்டப்பட்ட
நிகழ்வுகளும் மறைந்து போனது


காலை முதல் மாலை வரை
வாழ்க்கை முழுவதற்கும் சேர்த்து
சிரித்தது போல் சிரித்தது...
பாட நேரத்தில் ஆசிரியர் அசைவுகளை
கவனமாக கவனித்து - மதியஉணவுடன்
சேர்த்து அரைத்து சிரித்தது...


நினைவுகள் யாவும்
பள்ளி வராந்தா  ஒலியாக
உடம்பு முழுதும் பரவியது..
இக்குதுகூலம் கவிதை இல்லையெனில்
வேறு எது கவிதையாக கூடும்?

- சித்ரா
(k_chithra@yahoo.com)

நன்றி : திண்ணை (28-Jan-2013)
http://puthu.thinnai.com/?p=18076

Sunday, May 20, 2012

இந்நிமிடம் ..


இந்நிமிட குப்பிக்குள்
பழைய நினைவுகளை
புதிய நினைவுகளை
திணிக்க திணிக்க
திமிறி ஓடுகிறது அமைதி..


இந்நிமிட கொள் அளவில்
வைக்க வேண்டியதை மட்டும்
வைத்து எடுக்க எடுக்க -இந்நிமிடம்
அடுத்த ,அதற்கடுத்த நிமிடம் ..


மாற்று நிறங்களின் தறி பாவில்
ஊடு நூலாக - வளைந்து புகுந்து
அமைதியை நெய்ந்து தருகிறது
இந்நிமிடங்கள்...

நன்றி : திண்ணை

Monday, December 26, 2011

கல்லா … மண்ணா

என்னவோ துரத்துகிறது
எப்படியோ தப்பிக்கிறேன்


போயிராத கோயிலிருந்து
பிரசாதம் வருகிறது – கடவுள்
கொடுக்க சொன்னதாக ..


ஒடி ஒடி வருகிறேன்
ரயில் கிளம்பிவிட்டது !
பகீர் என்றானது – வாழ்க்கை
முடிந்து விட்டது போல் ..


தோளில் தட்டுகிறார்கள் – திரும்புகிறேன்
சிறுவயதில் உடன் படித்த தோழி.
சிரிக்கிறாள் , நானும் சந்தோஷமாக


வீடு வாங்கியதை தேவையற்று
சொல்லி கொண்டிருக்கிறேன் – அவள்
முகம் கோரமாக மாற தொடங்குகிறது


இறந்தவர்கள் நடக்கிறார்கள்
இயல்பாக பேசுகிறார்கள்


யாருடைய குழந்தையோ
பூங்கொத்து கொடுக்கிறது


என்னன்னவோ நடக்கிறது
முன்னுக்கு பின் முரணாக


விழித்து கொள்கிறேன்
கனவு கலைகிறது


நிகழ்வுகள் நிகழ்கின்றன
என்னன்னவோ நடக்கிறது – தொடர்கின்றன
புரிதலுக்கு பிடிபடாமலேயே …
இறந்தவர்கள் தென்படுவதில்லை
என்பதை தவிர ..

http://puthu.thinnai.com/?p=7306

தலைமை தகிக்கும்…

சூரியனை சூழ்ந்த கோளங்கள்
சுற்றி திரிகின்றன தனி சுதந்திரத்தோடு
தன்னை வட்டமடிக்கிற நிலா பெண்களோடு..

தலைமை பதவியின் தனிமையால்
கலகலப்பாய் பழக ஆளில்லாமல்
தனித்த தலைமை தகிக்க
சூரியனின் பெருமூச்சும் உஷ்ணமாய்

பூமியை நேருக்கு நேர்
நிறுத்தி கேள்வி கேட்டால்,
நிலா வருந்தி, கறுத்து விடுகிறாள்
கிரகண நோய் தாக்கி. !

பூமியை பின்னுக்கு தள்ளி
நிலாவை நேரே சந்தித்து
காதலை சொல்ல நினைக்கையில் – சூரியனுக்கே
கிரகணம் பிடித்து விடுகிறது..

மற்ற பால் வெளியில்
தன்னை போன்று திரியும்
சூரியன்களிடம் கேட்டு பாரக்கலாம்.
தகிக்காத தலைமை வசப்படுமா என ?

http://puthu.thinnai.com/?p=6169

அகாலம் கேட்கிற கேள்வி

ஆழ்வேர் நேச காதலினாலோ
பாசி படர், மாசு தொடர்பினாலோ
பத்து மாதம் காத்திருக்கிற எப்பிறப்பும்,
விநாடியில் மறைக்கிற அகால மரணமும்

அகங்காரமும், வன்மமும் தேவையா ?
அரிதிலும் அரிதான வாழ்க்கையில் என
கேட்கிறது காதோரம் ஓர் கேள்வி.

அகாலத்தின் கூர்முனையின் புரிதலை மையமாக்கி
வாழ்க்கை வட்டத்தை சுற்றி வரையாமல்,
பென்சில் முனையை நடுநாயகமாக்கி சுழற்றுகிறோம்
வாழ்க்கை வட்டத்தை கீறி கிழித்தபடி..

http://puthu.thinnai.com/?p=5883

நீவிய பாதை

பிறர் நிர்ப்பந்தித்த பாதையில்
பலவீனமாய் பாதம் பதிக்கையில்
முளைத்தது முதல் கோணல்.

அதிலிருந்து நீட்டிக்கப்பட்ட நேர்கோடும்
தொடர்கின்றன மலை பாதை வளைவுகளாக…
முற்றும் கோணலாகும் துற்சம்பவம்
தடுக்க பட்டது, அக அகழ்வாராய்ச்சியினால்..

பயங்கள் மக்கியிருந்தது பலவீனங்களாக.
ஒவ்வொன்றாய் அப்புறப்படுத்த படுத்த
நீவி நேராகிறது புதிய பாதைகள்..

http://puthu.thinnai.com/?p=5678

Sunday, October 30, 2011

நெடுஞ்சாலை அழகு..

பாலேடு சுருக்கங்களாய்
மடிந்து மடிந்து – குளத்து
நீரின் சிறு அலைகள்.

நீரேட்டின் மத்தியை பிடித்திழுத்து
மேலே தூக்கி விசிற விரிந்தது
போலொரு நீல வானம்- அதில்
புரண்டோடும் மேக கூட்டம்.

இக்கொள்ளை அழகுக்கு இடையே
கொணரிப் பட்டையில் அடுக்கபட்ட
சந்தை பொருட்களாக நகர்கிறோம்
அலுவலகம் நோக்கி நெடுஞ்சாலையில்


நன்றி : திண்ணை
http://puthu.thinnai.com/?p=5409

Sunday, October 23, 2011

சுடர் மறந்த அகல்

மாரியாத்தா….

சந்திகால வேளையில், ஓடி சென்று
நெய்வேத்யத்தை கொரித்துக் கொண்டே
சிவனிடம் அன்று நடந்தவைகளை
பகிர தோன்றியது இல்லையோ ?

மகிசாசுரன்களை வதம் செய்கையில், அசதியாக சாய
சிவன் தோளை காணாது துவண்டது இல்லையோ ?
பக்தர்கள் வரம் நிறைவேறி ஆனந்திக்கையில்
நெகிழந்து ,அழுத்தி பிடிக்க சிவன் கரம் தேடாதோ?

ஆர்த்தியின் பின்னொளியில் கண்டோம்,
உன்னை அம்மை தடுப்பவளாய் மட்டும்
தனித்து இயங்கும் திடமான உன் ஆளுமையை
பிரசாதமாக ,ஒரு துளியை சுவைத்திருந்தாலும்
இந்த கதி வந்திருக்குமா ,எங்களுக்கு?

ஆதியிலிருந்து பார்த்து கொண்டிருப்பவளே!
எப்போது வீழ்ந்தோம்? எதனால் வீழ்ந்தோம்?
சொல்லடி சிவசக்தி, சுடர்மிகும் அறிவுடன் மாற்றிவிடு .

நன்றி : திண்ணை
http://puthu.thinnai.com/?p=5255

Wednesday, October 19, 2011

கையாளுமை

காட்சி ஒன்று ..
மறுத்து பேசும் பிள்ளைகளிடம்
மன்றாடி மனு போட்டு,
மாறுவேடம் தரித்து பயமுறுத்தி,
கோரிக்கைகளை நிறைவேற்றிக் கொண்டு

காட்சி இரண்டு ..
உம்மென்றால் உம்மனாமூஞ்சிகளாகி,
ஏனென்றால் எரிமலையாய் எழும்
வயதான வீட்டு பெரியவர்கள்
மனம் கோணாமலிருக்க கோணாங்கியாகி ..

காட்சி மூன்று ..நான்கிலும்
ஏதோவொரு உத்தியை கையாண்டதில்
மான,ரோஷம்,வெட்கம்
சூடு, சொரனை யாவும்
இப்போது அஞ்சறை பெட்டியில்..
தாளிதத்திற்கு மட்டும்

நன்றி : திண்ணை
http://puthu.thinnai.com/?p=4919

முடிவுகளின் முன்பான நொடிகளில்...

வெற்றியின் நொடிகளை கொண்டாடலாம்
தோல்வியின் நொடிகளை தேற்றலாம்
முடிவுகள் அறிவிக்கும் முன்புள்ள,
மனதை கவ்வி முறுக்கும் நொடிகளை
என்ன செய்வது?


ஜெயிக்க வைக்க சொல்லி ஜபிப்பதா?
ஆசீர்வதிப்பாரோ , மாட்டாரோ என்ற
நிழல் தடுக்கி இடறுகையில் - கண்களை
இடுக்கி வேகம் கூட்டி ஜபித்தாலும்
மனக்கரைசல் திப்பிகளாய் தங்குவது நிற்பதில்லை


சரித்திர நாயகர்களின் சாதனைகளின்
நினைவுகளை துணைக்கு அழைத்தாலும்
இறுகி விடுகிற நொடிகளில் ,உள்இறங்காமல்
ஒழுகி ஓடி நழுவுகிறது நம்பிக்கைகள்..


மண்டை ஓட்டை அடைகாத்து என்னவாக போகிறது
சரிந்து இழுக்கும் இப்புதைக்குழி நொடிகளை
வலிக்க காத்திருப்பதினால் என்னவாக போகிறது
செய்ய வேண்டியவைகளை செய்வதை விட்டுவிட்டு ...

நன்றி : திண்ணை
http://puthu.thinnai.com/?p=5085

Saturday, October 1, 2011

கடவுளிடம் டிஷ்யூம்-டிஷ்யூம்

”முன் ஜென்ம” கணக்கு காட்டி
எனக்கு மறுக்கபட்டிருந்த அன்பை
நான் மற்றவர்க்கு கொடுத்து விட்டால்,
தண்டனையென எனக்கு விதித்ததை
எப்படி வசூளித்து கொள்வாய்?


உன் செயல்களை அறிய முயன்று
நான் தோற்கிற வரை
நீ பரம்பொருள் தான்..
நிகழ்வுகளின் மூல கூறுகளை
அறிய முற்படுவதையே விட்டுவிட்டால்
உனக்கு என்ன பெயர் வைத்துகொள்வாய்?


எதிர்காலத்தை கையில் கொண்டு
வித்தை காட்டி மகிழ்கிறாய்
எதுவாயினும் இருக்கட்டும் என
நான் விட்டு விட்டால்
உப்புசப்பற்று ஆகிவிடுமோ உனக்கு ?


இப்படி ,நீ தடுக்கில் புகுந்தால்
நான் கோலத்தில் புகுகின்ற போது
சரியான போட்டியென சொல்வாயா? - இல்லை
எனக்கு ஞானம் வந்துவிட்டது
என சொல்லி விடுவாயா ?

http://puthu.thinnai.com/?p=4450
நன்றி : திண்ணை

Sunday, September 18, 2011

காரணமில்லா கடிவாளங்கள்

பெரு வட்டம்
அதனுள் சிறுவட்டம்
மீண்டும் உள்வட்டம்
கருவட்டம் மையபுள்ளியாய்
குறிபலகை ஒன்று..

மைதானத்தில் எவனோ நட்டுவிட்டான்
வருவோர் போவோர் எல்லாம்
மையத்தை நோக்கி எய்த
ஆரம்பித்து விட்டனர் அம்பை..

பலகை வரை கூட செல்லாத ,
பெருவட்ட வளைவில் செருகிய ,
வட்டத்தை தொட்டு கவிழ்ந்த .- என
சிதறியது பலதரப்பட்ட அம்புகள்
தோல்வியென சுருங்கியது மனங்கள்

குறிபலகை இருக்கிறது என்பதற்காக
குறி எய்த வேண்டுமென
எவர் சொன்னது ?

கல்யாணம், குழந்தை, குட்டி
சம்பாத்யம்,பணம்,காசு
இதுதான் வாழ்க்கை என்றும்
எவர் சொன்னது ?

நன்றி : திண்ணை
http://puthu.thinnai.com/?p=4287

இலைகள் இல்லா தரை

உதிர்ந்த இலைகள்
ஓர் நவீன ஓவியம் ....
‘உயிரின் உறக்கம்’ -
என்ற தலைப்பில்

இலைகள் அள்ளபட்ட தரை -
சுவற்றில் ஓரம் சாய்க்க பட்ட
வெற்று ஓவிய பலகை

மற்றொமொரு
நவீன ஓவியம்
உதிரும் வரை

நன்றி : திண்ணை
http://puthu.thinnai.com/?p=4144

Friday, September 9, 2011

கூடியிருந்தோ குளிர்ந்தேலோ..

சூழ்ந்திருந்த மாமரமும்
சிறகடிக்கும் பட்டாம்பூச்சியும்
ரீங்காரமிடும் தட்டான்பூச்சியும்
மத்தியிலிருந்த நானும் – ஆளுக்கொரு
கை உண்டு குளிர்ந்தோம்
இடை-வெளியிலிருந்த நிச்சலனத்தை ..

நன்றி : திண்ணை
http://puthu.thinnai.com/?p=3480

அழகியல் தொலைத்த நகரங்கள்

தென்னைமர உச்சி கிளைகள்,
அடர்த்தியான வெண் மேகம்
நீல வான பின்னணியில் ..
இயற்கை ஓவியத்தின் கீழ் குறுக்கில்
கிறுக்கல் கோடுகள் -
கோணல் மாணலாய் தொங்கும்
கேபிள் டிவி கம்பிவடங்கள்..

சாலை அமைக்கவே ஒரு துறையும்
கொத்தி குதறவே மற்ற துறைகளும்
வீட்டு ஜன்னலிருந்து கைநீட்டினால்
சாலை தரை தட்டும் – மேன்மேலும்
உயர்ந்து விட்ட சாலை-சீரமைப்புகளும்!!
அவரவர்களுக்கு உண்டான காரணங்களோடு ..

காற்றிலும் , அதிராத அளவான
ஒயிலாக கிளையிலை அசைக்கிற
அழகியல் அறிந்த மரங்களுக்கு
மூன்றாம் தர ஜிகினா தொங்கல்கள்
கண்ணை எரிக்கும் பளீர் நிற
குட்டி மின்குமிழ் விளக்குகள்
விசேஷ வரவேற்பு காலங்களில்!

நன்றி : திண்ணை
http://puthu.thinnai.com/?p=3717

நிலா மற்றும் ...

மழை சேமிப்பு திட்டம்..
மொட்டை மாடியில்
பொழிந்த மழைக்கென..

நிலா சேமிப்பு உண்டா ?
மொட்டை மாடியில்
பொழிந்த நிலவுக்கென ..

அவசரகதி தட்டுபடாத
பிறிதோரு நேரங்களில்
ஒன்று கூடி நாங்கள்
நிலா சோறு உண்ண..

மின்-விளக்கு
காய்ச்சலில் கழிகிறது
எங்கள் முன்இரவுகளும் பகல்களும்
அவரவர் அறைகளில்..

சேமிக்க தெரியவில்லை
நிலா மற்றும்
இன்ன பிற ..

நன்றி : திண்ணை
http://puthu.thinnai.com/?p=3955